-
Penette
par Noëlle Fourrier
La Bertagne c’ét un peyiz de lejendes e de menteries.
Chéz maï den le peyiz d’la Mée on fezae pou ous qeniaos aové Penette, ene béte qi vient le saïl e qi emmene les garçailles qin’sont pouint saïjes .
D’après qe ça s’raet ene béte come ene oueille tote en laingne, més je cres ben qe persone l’a vue.E pi on dit oussi q’ale empéche les bonomes de rentrë chéz yeûs, cant is ont pâssë la raissiée den les celiers.
Ale s’mét ou travers du chemin e faot qi s’battent pour pâsser, més come c’ét d’la laingne ça boule de tot les amains.
Cant is arrivent à pâsser, i rentent chéz yeûs tot echaobouillës e des fais i gobent un chaod-erferdi.
I sont obllijës de rester couchës le lendemain.
En pu d’ça la bone fenme n’ét pouint pllogante e is ont dret ou litanies de Sainte Grogne.
Vla l’istouère de Penette qe nous contaet ma grand-mére.
D’apré yelle ale avaet connu des siens a qi ça taet arrivë.
M’ét aviz qe ça devaet ben y’étr ene couzine à la béte de Berë.